Act 25 | NdeIBE | STEP | Ngemuva kwezinsuku ezintathu efikile esifundeni uFestu wasuka eKhesariya waya eJerusalema

Acts 25

Ukuthonisiswa Phambi KukaFestu

1 Ngemuva kwezinsuku ezintathu efikile esifundeni uFestu wasuka eKhesariya waya eJerusalema 2 lapho abaphristi abakhulu labakhokheli babaJuda bema phambi kwakhe beneka amacala kaPhawuli. 3 Bamcela uFestu ngokuphangisa, ukuba abenzele umusa, abalethele uPhawuli eJerusalema, ngoba babelungisa ukumcathamela bambulale endleleni. 4 UFestu waphendula wathi, “UPhawuli uvalelwe eKhesariya, njalo mina ngokwami ngiyakhona masinyane. 5 Akuthi abanye abakhokheli bakini bahambe lami bafike bamethese amacala khonale, aluba kukhona akonileyo.”

6 Esehlale izinsuku ezificamibili loba ezilitshumi labo wehlela eKhesariya, kwathi ngosuku olulandelayo wangenisa inkundla wathi kalethwe uPhawuli phambi kwakhe.

7 Esefikile uPhawuli abaJuda ababefikile bevela eJerusalema bambunganyela, bethula amacala amanengi esabekayo ngaye, kodwa bengelabufakazi ngawo.

8 UPhawuli wasezivikela wathi: “Angenzanga lutho oluphikisa umlayo wabaJuda kumbe ukudumaza ithempeli, kumbe oluphikisa uKhesari.”

9 UFestu wayefuna ukwenzela abaJuda umusa, wathi kuPhawuli, “Uyavuma na ukuya eJerusalema ukuthi ngiyekuthonisisela khona ngala amacala?”

10 Waphendula uPhawuli wathi: “Khathesi sengisiyakuma phambi kwenkundla kaKhesari, lapho engifanele ukuthonisiswa khona. Kangenzanga lutho kubaJuda, njengoba lawe usazi kakuhle. 11 Kodwa, uma ngilecala lokwenza loba yini efanele ukufa kangali ukubulawa. Kodwa uma lawomacala engiwetheswa yilaba abaJuda engasiqiniso, kakho olelungelo lokunginikela kubo. Ngilidlulisela kuKhesari!”

12 UFestu esehlanganise amakhanda lomphakathi wakhe, wathi, “Usulidlulisele kuKhesari. KuKhesari usuzahamba!”

UFestu Ubonisana LeNkosi U-Agripha

13 Sekuyizinsuku ezimbalwa ngemva kwalokho iNkosi u-Agripha loBhenikhe bafika eKhasariya ukuyaqinisa ubudlelwano laye uFestu. 14 Njengoba babezachitha izinsuku ezinengi khona, uFestu wakhuluma leNkosi ngendaba kaPhawuli. Wathi, “Kulendoda lapha eyatshiywa nguFelikhe iyisibotshwa. 15 Ngathi ngiseJerusalema abaphristi abakhulu labadala bamaJuda bayimangalela ngamacala athile, bacela ukuthi ibulawe.

16 “Ngabatshela ukuthi kakusumkhubo wamaRoma ukunikela umuntu engakahlanganiswa labamangaleli bakhe, waphiwa ithuba lokuzivikela kulawo macala abambeka wona. 17 Bathi sebefikile lapha behamba lami, kangiliphuzisanga icala, kodwa ngahle ngayihlanganisa inkundla ngosuku olulandelayo ngathi indoda leyo kayingeniswe.

18 Sebephakamile ukuba bakhulume kabasambekanga lawomacala engangiwakhumbula. 19 Kodwa, kulezinto ezithile ababephikisana ngazo laye mayelana lenkolo yabo langenye indoda eyafayo ethiwa nguJesu, uPhawuli athi yena iyaphila. 20 Ngisuke ngadideka ukuthi ngizicubungule njani izindaba ezinjalo; yikho ngimbuzile ukuthi angavuma yini ukuya eJerusalema ayothonisiswa khona ngamacala la. 21 Kuthe uPhawuli esethe ucela icala lakhe limiswe liyoqunywa nguMbusi oMkhulu, ngithe kagcinwe entolongweni ngize ngimdlulisele kuKhesari.”

22 U-Agripha wasesithi kuFestu, “Ngifuna ukuthi kengiyizwe mina ngokwami indoda leyo.” Waphendula wathi, “Uzayizwa kusasa.”

UPhawuli Phambi Kuka-Agripha

23 Ngakusasa u-Agripha loBhenikhe bafika becicima ngodumo olukhulu bangena emthethwandaba lezikhulu zakhona ezaziwayo kanye labakhokheli bedolobho. UFestu wathi uPhawuli kalethwe. 24 Wathi uFestu, “Nkosi Agripha, lani lonke elikhona lathi lapha, liyayibona indoda le! Sonke isizwe samaJuda eJerusalema lakhona lapha eKhesariya senza isikhalazo kimi bememeza ukuthi kayisafanelanga ukuthi ibe ilokhu iphila.

25 Ngafumana ukuthi kwakungelalutho alwenzayo olufanele ukufa, kodwa ngenxa yokuthi wacela ukudluliselwa kuMbusi oMkhulu, ngakhetha ukuthi ngimdlulisele eRoma. 26 Kodwa kakulalutho olubambekayo engizalulobela uMhlekazi ngaye. Yikho sengimlethe lapha phambi kwenu lonke, ikakhulu phambi kwakho wena Nkosi Agripha, ukuze kuthi ngemva kokumhlola hlezi ngithole ulutho engingaluloba. 27 Ngibona kungaba liphutha elikhulu ukuthumela isibotshwa ngingacacanga ngamacala esiwethweswayo.”